مسلم يهاجم مصطفى كامل ونقابة المهن الموسيقية بسبب قرار إيقافه

هاجم مطرب المهرجانات مسلم الفنان مصطفى كامل ونقابة المهن الموسيقية، بعد استمرار قرار منعه من ممارسة الغناء منذ مارس الماضي.

وكتب مسلم عبر خاصية القصص القصيرة في حسابه على Instagram: “هما عادي ممكن يسيبوا حد يبوس واحدة على الاستيدج وبعد كده يفرشوا الأرض ورد ليه ويستقبلوه أحلى استقبال، وعادي يسيبوا حد يقول إيحاءات في الأغاني وعادي محدش برضه يتكلم، وعادي يسيبوا حد يقول كلام في أغاني يخلي العيال الصغيرة تعور بعضها”، مضيفًا: “وكل دول ما يتحاسبوش وأنا اللي أفضل قاعد سنة بدون شغل عادي جدًا، بس أقولك إيه هيا دي الواحد لما يكون معاه سلطة بيدوس على أي حد ويطلع يتكلم باسم الفضيلة وإنه راجل عادل وعمره ما ظلم حد، حسبي الله ونعم الوكيل، نقابة مش عادلة”.

وكان مسلم قد نفى قيامه بوقفة احتجاجية أمام نقابة المهن الموسيقية، موضحًا في مداخلة هاتفية مع الإعلامي أحمد سالم ببرنامج “كلمة أخيرة” على قناة ON: “مكانش فيه وقفة احتجاجية، كل الكلام ده كذب وإشاعات، هو إحنا أيام التحرير هنزل أعمل وقفة احتجاجية عند النقابة؟ ليه يعني؟ محتاج إيه علشان أعمل كده؟ وأنا إنسان مش جاهل، أنا متعلم، وما يطلعش مني الفعل ده”.

وأضاف مسلم أنه كان في طريقه للنقابة لحل أزمته والعودة لممارسة الغناء، مؤكدًا أنه أنهى مشكلته مع شركة إنتاج صوتي كبيرة وحصل على عقد جديد تمهيدًا لاستئناف نشاطه الفني.