آسر ياسين: “عيطت 3 أيام بعد حلقة صاحبة السعادة.. ومدام إسعاد فكرّتني قد إيه ربنا كان كريم معايا”

تحدث الفنان آسر ياسين عن تأثير لقائه في برنامج “صاحبة السعادة” على حياته، مؤكدًا أن الحلقة جاءت في وقت كان يمر فيه بحالة من الشك وعدم اليقين في نفسه وفي كل ما حوله.

وقال آسر ياسين خلال بودكاست “حوارات مع عباس” مع عباس أبو الحسن: “من فترة عملت حلقة مع حبيبتي إسعاد يونس، ولما اتفرجت على الحلقة دي والطريقة اللي مدام إسعاد اتكلمت بيها عني، حسّيت بحب كبير جدًا، ولما عرضت الشريط اللي ابتديت بيه من أول أعمالي لغاية النهارده، أنا عيطت قعدت أتفرج على الحلقة دي على 3 أيام، وكل مرة كنت أعيط من جديد”.

وأضاف: “افتكرت قد إيه ربنا كان كريم معايا واداني فرص كتير، وأنا كنت ناسي ده في وقت شكّيت إنّي مش بعمل الصح، وشكّيت حتى في إيماني، وبعد الحلقة قلت لنفسي: أنا آسف إني في يوم شكّيت”.

وتحدث آسر ياسين عن أحدث أعماله الفنية، قائلاً إنه انتهى مؤخرًا من تصوير فيلم “وتر واحد” مع الفنان ويجز، موضحًا: “بدور في الفيلم على مدير أعمال للمواهب، والموهبة اللي بيديرها هي شخصية ويجز، والدور ده من أحلى الأدوار اللي قريتها، فيه مزيج من التناقضات وغنى نفسي كبير”.

وعن كواليس تصوير أحد مشاهد الفيلم خلال حفل ويجز في العلمين الجديدة، قال: “المشهد ده أول مشهد في الفيلم، وأول مرة تطلع فيه الشخصية كنت خايف أغلط، لكن الحمد لله ربنا وفقنا، وتاني يوم كملنا التصوير الناس كانت بتسأل هل ده آسر ولا لأ، واللي حضر الحفلة دي حضر حاجة للتاريخ، وهيحكي لأولاده عنها”.

أما عن اللوك الذي ظهر به في الفيلم، فأوضح آسر: “جهزناه في يومين بس عشان كنا مستعجلين أنا بحب التاتو والشنب، وجدي وأبويا كانوا دايمًا بشنب، فكان نفسي أعمل شنب شبه شنب جدي الرفيع حاولت أبعد عن شخصية (الشايب) في الشكل، رغم إن في شبه بسيط بينهم”.

يذكر أن آسر ياسين شارك في موسم رمضان 2025 بمسلسل “قلبي ومفتاحه” مع الفنانة مي عز الدين، وشارك في بطولته دياب، أشرف عبد الباقي، أحمد خالد صالح، سماء إبراهيم، حازم سمير، عايدة رياض، وتقى حسام، ومن تأليف وإخراج تامر محسن، وإنتاج شركة Media Hub سعدي – جوهر.